الشاعر سعيد سعيد امام يكتب لما القلوب تصون

 

لما القلوب تصون

بقلم الكاتب وشاعر البسطاء سعيدسعيدامام

في ناس تمشي في الدنيا وتسيب وراها حنين

وفي ناس تعدي من العمر ولا تسيب غير انين

وفي ناس لما تقرب منك تحس الدنيا امان

وفي ناس قربها يوجعك وانت ساكت حزين

انا قابلت في سكتي ناس كتير مختلفين

ناس وشها كان بشوش وقلوبها صافيين

وناس لبسوا ثوب الوفا ولما احتجتهم غابوا

وعرفت ان مش كل اللي بيقول صاحب امين

في واحد لو شاف دمعك يقول لك انا هنا

ويمد ايده وقت ضيقك من غير ما يستنى

وفي واحد لو شاف فرحتك يحسبها خسارة

كان نفسه يشوفك مكسور علشان يرتاح سنين

انا مش زعلان من اللي خان ولا اللي باع

ولا هعاتب قلب اختار يبعد وراح

اللي اختار الغدر لنفسه انا اسيبه لزمانه

وانا اختار ناس تشيلني وقت ما ابقى حزين

اصل الجدع مش بالكلمة ولا بكتر الكلام

الجدع وقت المواقف لما ييجي وقت الامتحان

تلاقيه واقف جنبك حتى لو الدنيا مالت

ولا يسأل انت هتديني ايه ولا هتجيب كام

والطيب مش ضعيف ولا طيبته انكسار

ده اللي يقدر يرد الوجع ويختار الانتصار

يسامح لما يكون التسامح فيه خير

ويبعد لما يعرف ان القرب بقى مرار

انا اتعلمت من الدنيا ومش هنسى اللي كان

ان القلوب معادن والمواقف لها ميزان

وان اللي يصون عشرة العمر مهما العمر يطول

يتحط فوق الراس ويتحفظ له المكان

وفيه ناس لو غبت عنهم يوم يفتكروا الغياب

يسألوا عليك بمحبة مش فضول ولا عتاب

وفيه ناس لو شافوك غايب يقولوا ارتحنا

كان وجودك في حياتهم حمل وتعب وعذاب

فيا صاحبي اختار صاحبك قبل ما تختار الطريق

مش كل ضحكة في وشك معناها قلب رفيق

خلي اللي يدخل حياتك يعرف قيمة العشرة

ويكون وقت الضيق اول واحد يقول انا شقيق

ولو رزقك ربنا بحد صادق ومحترم

صونه ولا تفرط فيه مهما الزمن اتقسم

لان القلوب الصافية مش بتتكرر كتير

واللي يلاقي قلب وفي يبقى لقى كنز ثمين

ولو اتوجعت في يوم من ناس كنت فاكرهم امان

متقفلش قلبك وتقول خلاص مفيش انسان

يمكن اللي جاي يعوضك عن كل اللي فات

ويمكن تلاقي في شخص واحد عمر من السنين

انا قلبي لسه بيحب ولسه عنده يقين

ان الخير موجود ولسه في الدنيا طيبين

ولسه فيه حضن يطمن ولسه فيه صاحب يصون

ولسه فيه ناس تستاهل نعبر لهم سنين

مش عايز من الدنيا كتير ولا طالب مستحيل

عايز قلب مرتاح وصاحب وقت الضيق يشيل

وعايز لما امشي في يوم من الدنيا دي

اسيب سيرة تقول كان انسان طيب وامين

دي كل حكايتي يا صاحبي من غير زوق ولا تلوين

انا عايز اعيش بين ناس قلوبهم متصافيين

ناس لو اختلفنا نرجع وننسى اللي كان

ونفضل رغم اختلافنا لبعضنا اقرب قريبين

لان العمر مش مضمون ولا الايام امان

واللي باقي من العمر يستاهل حب وحنان

فلو عندك قلب بيحبك بجد ومتطمن ليك

خليه في عينك وصونه قبل ما يبقى حنين

وفي اخر الكلام لو سألتني مين كسبان

هقول اللي عاش بضمير ومسابش وراه انسان حيران

واللي زرع محبة في قلوب اللي حواليه

ده يوم الرحيل يفضل عايش في قلوب الملايين

بقلم الكاتب وشاعر البسطاء

سعيد سعيد امام