تصريح حسام حسن عن استبدال حسام امام عاشور بعد فوز مصر علي زيمبابوي في أمم أفريقيا

 

تصريح حسام حسن عن استبدال  حسام امام عاشور بعد فوز مصر علي زيمبابوي في أمم أفريقيا

كتب:احمدعبدالنبي  🇪🇬

22/21/2025

تصريح حسام حسن عن خروج إمام عاشور 

🎙️حسام قال…”إن اللاعب مطلعش علشان وحش، لكن علشان لسه راجع من إصابة وكان خايف عليه من ضغط المباراة وإن الماتش يبقى تقيل عليه. كلام يُحترم من حيث الحرص على اللاعب، ومحدش يختلف على نية الجهاز الفني.”

 بس من وجهة نظري، ومن وجهة نظر أغلب اللي تابعوا الماتش، إمام عاشور كان أفضل لاعبي المنتخب في النصف ساعة اللي لعبها. اللاعب كان حاضر ذهنيًا وبدنيًا، بيتحرك، يستلم، يخرج بالكرة من نص الملعب، وبيكمل الهجمة بشكل خطير. مكنش باين عليه أي علامات إجهاد لا بدني ولا ذهني، بالعكس، في لاعيبة تانية كان الإرهاق والتوهان واضح عليهم جدًا زي محمد حمدي، حسام عبدالمجيد، وحمدي فتحي.

 كل الدعم طبعًا للكابتن حسام حسن وجهازه الفني لحد آخر المشوار، لأن النجاح أو الفشل مسؤولية جماعية. لكن علشان الأداء يبقى متوازن، لازم يبقى فيه تصحيح لبعض الاختيارات اللي كانت باينة إنها مش موفقة. حسام عبدالمجيد كان متضغط عليه بشكل واضح، ووجود رامي ربيعة أو خالد صبحي هيكون أهدى وأأمن في التوقيت ده. محمد حمدي كان تايه، وأحمد فتوح بديله الطبيعي والأكتر تأثيرًا هجوميًا ودفاعيًا.

 في النص، إمام عاشور لازم يلعب 8، ده مركزه الحقيقي وتأثيره الأكبر، وحمدي فتحي يطلع، مع تثبيت مروان عطية في مركز 6 زي ما هو. قدامهم، تريزيجيه جناح شمال، زيزو في العمق، صلاح جناح يمين، ومهاجم صريح عمر مرموش بدل ما يكون تايه بين أكتر من دور.

- - - - 

الخلاصة إن التحفظ الزايد ساعات بيضر أكتر ما بينفع. إمام عاشور لاعب وجوده بيوازن الفريق، وغيابه بيبان فورًا. التصحيح لسه ممكن، بس محتاج جرأة ووضوح في الاختيارات.