جعجعة حكي ... جميلة مزرعاني... لبنان

 

  جعجعة حكي   

مين قال كبرنا  

وشاب الزّمن بمراكبنا  ؟  

جعجعة حكي واخبار   ..

همزات لمزات حسّاد   ..

تتشفّى بتاريخ مولدنا   ..

مش مهمّ يعدّوا سنين  ..

ويتناسوا حصاد رحلتنا  ..

بعرش العمر كبر المقام  ..

بعدو الهوى شاغلنا   ..

بعدو القلب بيرعد رعد   ..

متل الرّيح بتعصف بليلة برد  ..

بجنّات الحبّ آسرنا  ..

يسبينا الحلم صوب السّحاب  ..

نسرّح النجمات من غبشات الغيم  ..

تشرد تلاقينا بلمعات الضوّ  ..

ع فضا العشق هالوله سايسنا  ..

يناجينا من صرحو القمر  ..

بنورو  يواسينا  ..

يسكرنا بخلجات الغرام  ..

متل عصافير دابت ع الأفنان  ..

مين بصدّق إنّا كبرنا  ؟  ..

جعجعة حكي واخبار  ..

ما بشيخ العمر  ..

إلّا بسجلّات تذاكرنا  ..

جميلة مزرعاني 

لبنان  / الجنوب